МОНГОЛООС ДЭЛХИЙН ӨВД БҮРТГҮҮЛЭХ УРЬДЧИЛСАН ЖАГСААЛТАНД Дэл уул БАГТДАГ. 

Байгалийн болон соёлын өвийг хамгаалж, таниулан сурталчлах, хойч үедээ үлдээх зорилгоор 1972 онд Дэлхийн байгалийн болон соёлын өвийг хамгаалах тухай ЮНЕСКО-гийн Конвенцийг батлан хэрэгжүүлж эхэлсэн билээ.
2014 оны байдлаар тус Конвенцид 191 улс нэгдэн орсон бөгөөд 161 улсын нийт 1007 байгалийн болон соёлын өв Дэлхийн өвийн Жагсаалтад бүртгүүлсэн. Үүнээс нийт 779 нь соёл, 197 нь байгалийн, 31 нь хосолмол өв байна.

Монгол улс Дэлхийн өвийн Конвенцид 1990 онд нэгдэж орсон.
1999 онд Монголын байгалийн болон соёлын өвийг Дэлхийн өвд бүртгүүлэх, Урьдчилсан жагсаалтад оруулах, Дэлхийн өвд бүртгүүлсэн өвийн болон Конвенцийн тайлан илтгэлийг бичих, Конвенцийн хэрэгжилтийг хангах ажлыг зохион байгуулах үүрэг бүхий Дэлхийн өвийн Үндэсний хороог соёлын болоод байгаль хамгааллын зүтгэлтэн, мэргэжилтэн, нэрт эрдэмтдийн бүрэлдэхүүнтэй байгуулсан. Хамгийн сүүлд 2013 онд Дэлхийн өвийн үндэсний хорооны бүрэлдэхүүнийг шинэчлэн баталжээ.

УРЬДЧИЛСАН ЖАГСААЛТ
Дэлхийн өвд бүртгүүлэхийн тулд тухайн газар нутгийг Үндэсний Урьдчилсан жагсаалтад оруулах ёстой
2014 онд Монгол Улс Үндэсний Урьдчилсан жагсаалтыг шинэчлэн боловсруулж, 2015 оны Дэлхийн өвийн хорооны 39 дүгээр чуулганаар Монголын Дэлхийн өвийн Урьдчилсан жагсаалтыг албан ёсоор баталсан.

2017 оны байдлаар Монгол Улсын Урьдчилсан жагсаалтад нийт 12 газар байгаагийн соёлын ангилалын 8 газрын нэг нь
"МОНГОЛЫН ГОВЬ ДАХЬ ХАДНЫ ЗУРГИЙН ЦОГЦОЛБОР" юм.

Энэ цогцолборт:
1. Дундговь аймгийн Өлзийт сумын Дэл уулын хадны зургийн цогцолбор
2. Баянхонгор аймгийн Баянлиг сумын Бичигтийн амны хадны зургийн цогцолбор
3. Өмнөговь аймгийн Ханбогд сумын Жавхлант хайрхан уулын хадны зургийн цогцолбор багтдаж байгаа юм.
Б.Батмөнх
2017 он.