ЖУУЖАА ЭГЧ

Үй зайгүй шороо босдог
Үйзэн жас дээр сум байхад
Жуулхан амьтан явлаа даа би
Жуужаа багш мэднэ.
Төрийн шагналт, СГЗ, зохиолч Долгорын Нямаа

Манай алтан үеийнхний хэдэн сайхан буурай нараас
хамгийн өндөр насалж байгаа нь манай Дашдаваагийн Жуужаа эгч буюу Ажаа.
Жуужаа эгчийн түүх намтар арвин их бөгөөд сонирхолтой.
Өлзийт сумыг Хөнжилийн Далайн хийд дээр байхад Дарьзав
Аниагийнд Сумаагийн Гомбодоо, Цүлхрэмийн Цэнд,
Дарьзавын Нацаг нартай хамт 1-р ангид сууж эхлээд Тагт дээр
4-р анги төгсч Сайнцагааны Наран, Үйзэн бригад, аймгийн төв
дамжин дунд сургуульд сурч 7-р анги төгсөөд шууд багшилж
байсан, Багшийн дээдийн анхны элсэгч бөгөөд анхны төгсөгч,
одоогийн Багшийн дээд дээр байсан Засгийн Газрын ордныг
одоогийн Төрийн ордон уруу нүүхэд гар бие оролцон дарга
нарын ширээ сандал, бичиг хэргийг зөөлцөж байсан, тэмээн
жингийн хүмүүстэй хамт Өлзийт сумаас Улаанбаатар хотод
ирж байсан зэрэг үлгэр домог шиг сонирхолтой түүх намтартай
хүн.
Хүүхэд байхдаа мал сайн малладаг, малд нүдтэй /мал сайн
зүсэлдэг/, эмнэг хангал сургадаг, хөдөөний ажилд эцэг эхдээ
тус дэм ихтэй байсан тухай манай дээд үеийн настайчууд хууч
хөөрдөг байсан.
Хэл уран зохиолын багшаар 40 жил багшилж энэ хугацаанд найман удаа анги даан төгсгөж, сургууль нь монгол хэлний олимпиадад найман удаа түрүүлж байсан, шавь нараас нь Төрийн шагналт, Соёлын гавьяат зүтгэлтэн Долгорын Нямаагаас эхлээд олон арван шилдэг сэхээтнүүд, төр нийгмийн зүтгэлтэн, урлаг соёлын зүтгэлтнүүд, гавьяатууд төрөн гарчээ.
Миний Жуужаа эгчтэй анх танилцсан түүх гэвэл бас
сонирхолтой. Бор гэр, хайртай ээж, эмээ хоёроосоо ганц ч хоног холдож үзээгүй хөдөөний найман настай би Дундговь аймгийн төвд ирж сургуульд суусан юм. Гэрээ санана гэж жигтэйхэн.
Жуужаа эгч манай ээжтэй дэндүү адилхан харагдах. Сургууль
дээр хааяа тааралдахаараа ижийгээ харсан юм шиг хачин их
баярладаг байж билээ. Одоо ч уулзахаараа хамгийн түрүүнд
багийн тэр л явдал санаанд ордог юм. Батбуян нэг дүгээр ангид байхдаа Жуужаа эгчтэй сургууль дээр тааралдах болгондоо “Жуужаа эгчээ” гэж дуудан очиж үнсүүлдэг байсан гэсэн.
Манай Жуужаа эгчийн хүүхдүүд, ач, зээ нар нь оюуны
чадавх сайтай, өндөр ёс суртахуунтай, эрхэлсэн ажил
мэргэжилдээ амжилт бүтээл арвинтай мундаг хүмүүс байдаг.

Дундговиос олон зохиолч яруу найрагч төрсөн нь хэл уран зохиолын багш энэ хүнээс хамаатай ч байж мэднэ.
Бичээчийн Батмөнх.
2017 он