ПҮҮЖИЙ, АМГАА, БЭЭГИЙ НАРТАЙ

Сандагдоржийн Пүрэвсүрэн, Жанлавын Билэгтхүү, Бадамдаарийн Энх-Амгалан бид хэд Дундговийн Өлзийт сум дайраад Буянт багийн алдарт малчин Баавгайн Дэмбэрэлийнхээр ороод ирлээ.
Өлзийт суман дээр очдог өдөр тэнд түм түжгэнэж бум бужигнаж байхтай таарав.
Өлзийтийн хүүхнүүд сумандаа цуглажээ. Торгон дээлээ өмсөж одонгоо зүүсэн алдарт ээжүүд, ганган ганган хослолоор гоёсон залуу бүсгүйчүүд сумын төвөөр дүүрэн.
Энэ сумын эмэгтэйчүүдийн хамгийн олон баяр давхацдаг уламжлалт өдөр гэнэ.
Хурал, уулзалт, зөвлөгөөн, сургалт, шагнал, хандив тусламж, дуу хуур, цэнгээнт бүжиг, Малчин эмэгтэйчүүдийн чуулган, Мартын найманы баяр, “Дархан бэр” шалгаруулалт, дуучин Дэлгэрмөрөнгийн “Наян булгийн аялгуу" тоглолт, Бат-амьдралын фото, “Mister Dogs” хамтлаг, Ямаха мотоциклийн сугалаа, Од–Эрдэнэ даргын улаан сарнай, япон явах азтанаар тодорсон малчин, “Хөгжилтэй аялал” компанийн аялал гээд Өлзийтийнхөн оволзож байв.
Зочид буудал цөөхөн байна л гэнэ, 200 хүний суудалтай соёлын төв нь жижигдлээ л гэнэ, “Дундговийн амьдрал” сонин тараасан хүрэлцсэнгүй л гэнэ.
Суманд “Жишиг сум” төсөл хэрэгжээд Өлзийт сумын төв сайхан болчхож.
Ямар ч гэсэн дөрвөн замын уулзвар бүхий засмал замтай, гудамж нь гэрэл гэгээтэй, байр сууц, сургууль эмнэлэг нь нийтийн халаалттай болж паартай байшинтай, паалантай жорлонтой болжээ.
Өлзийт сумыг ингэж өнгөтэй гэрэлтэй гэгээтэй болгоход Батсүхийн Наранхүү, Сандагийн Од-эрдэнэ, Ичинхоролоогийн Эрдэнэбилэг, Хүүхэний Отгонмөнх, Авирмэдийн Эрдэнэбилэг, Шатарын Энхбат зэрэг хүмүүс нэмэр хандив болсныг дурдахгүй өнгөрч болохгүй.

Ийм сайхан нутгийнхаа ийм сайхан зон олныхоо ийм сайхан энергитэй үйл дундуур очсон бид хэдийн ажил жигтэйхэн сайхан бүтэв.
Өлзийтийн баруун талын Долгорын Нямаа, зүүн талын Долгорын Даариймаа нарын бүтээл “Өлзийтөөс би нүүхгүй” дууны клипний зураг авалт эхэлсэн, Дэл Хөнжилийнхний тухай бүтээлүүд үргэлжилсэн, Буянтын харчид хэмээх маш гайхамшигтай хүн зоны тухай шинэ бүтээлийн шав тавигдсан.

Мөн хоёр төрийн нүүр үзэж, хоёргүй сэтгэлээр Монголынхоо төлөө нуруугаа бөгтийж, хуруугаа мойтол зүтгэсэн Цээмээ хэмээх Найдангийн Цэвэгмид, Батлах гуай, Баавгайн Дэмбэрэл зэрэг энэ сумын түүхийн санах ой болсон агуу өвгөдийн архивыг хоёр өдөр “уудлаж” ажлаа амжуулав.

Ийнхүү хэвлэл мэдээллийнхэнд Дундговийн Пүрэвсүрэн хэмээгддэг Пүжээтэй анх удаа дөрөө харшуулж, Наранцацралт асанаар “Билэгтхүүг дууд” гэгдүүлж байсан Бээгийгээр газарчуулж, “Анд”-ын Амгаагаар зурагжуулж, хамгийн сүүлд нь 4-р Брагри лам Дамцагдорж гэгээнтний сойвон ламтай зам нийлж түүний ярьсан 40-өөд Жип машинаар Цогтцэций сумаас гэгээнтэн залсан тухай сонирхолтой түүх сонссон шигээ сайхан яваад ирлээ.
Ингэж нэг сайхан ажлаа үргэжлүүлж, хоёр сайхан ажил шинээр эхлэв.
Дэл уулын Бичээчийн Батмөнх
2018-03-10